Norðlensk þríþraut á Laugum í Reykjadal

Norðlensk þríþraut var haldin á Laugum í Reykjadal laugardaginn 15. ágúst sl. og voru þátttakendur 31, sem telst mjög gott. Það er Þríþrautarfélag Norðurlands sem stendur fyrir þrautinni og starfsfólk kom frá líkamsræktarstöðinni Bjargi á Akureyri.  

Að þessu sinni rennur allur ágóði af þríþrautinni til Gísla Sverrissonar og fjölskyldu hans, en Gísli lamaðist í hjólreiðaslysi fyrir ári síðan. Þeir sem vilja styrkja Gísla án þess að taka þátt í  þrautinni geta lagt beint inn á söfnunarreikninginn hans: Gísli Sverrisson: kt. 180561-7069. Reikningsnúmerið er 0565-14-400216.  

Þetta var í áttunda sinn sem Þingeyingar standa fyrir þríþraut og í fimmta sinn sem hún fer fram á Laugum, en fyrstu þrjú árin var þríþrautin haldin í tenglum við Mærudaga á Húsavík. Þessi íþróttaviðburður er ætlaður almenningi, jafn sem keppnisfólki í greininni.  
 

Keppendur í ólympískri þríþraut voru 8, en hún felst í því að synda 1500 metra, hjóla 40 kílómetra og hlaupa 10 kílómetra. Helga Árnadóttir Kelduhverfi náði bestum árangri í kvennaflokki á tímanum  2.38,09. Hún var eina konan sem lauk ólympískri þraut, en tími hennar hefði nægt í verðlaunasæti í opnum flokki. Andri Steindórsson Akureyri var fljótastur karla á tímanum 2.20,41. Hartmann Bragason Reykjavík var annar og Unnsteinn Jónsson Akureyri þriðji.

Frelsi eða ánauð

Þetta myndband, sýnir nokkrar heimskunnar manneskjur, sem hafa átt við geðhvörf að stríða, eða Bipolar Disorder.  Ég fann það á bloggsíðu Jóns Steinar Ragnarssonar http://prakkarinn.blog.is

Sjúkdómurinn er ekki  til að skammast sín fyrir þótt oft leiði hann af sér niðurlægingu í þjóðfélaginu.  Sjálfur hef ég kynnst allt of mörgu hæfileikaríku fólki sem tókst að sigrast á sjúkdómseinkennunum en ekki á fordómum samfélagsins. Mér varð hugsað til þeirra þegar ég sá þetta myndband.

 

Manchester United evrópumeistari

Frábær árangur hjá mínum mönnum.  Þetta er e.t.v. besta Man. Utd. lið frá upphafi. Leikurinn var einstök skemmtun þar sem bæði lið lögðu allt í sölurnar.  Heppnin var með þeim rauðu, sem voru mun betri í fyrri hálfleik, en gáfu eftir í þeim seinni.  Þeir bláu sýndu dugnað og trú á sigur og ég verð að viðurkenna að þessi viðureign gat farið á hvorn veginn sem var. Vítið frá Ronaldo var ekki nógu gott og ég fann til með John Terry að renna til á blautum vellinum á úrslitastundu. Anelka gerði ágætlega í sinni spyrnu sem Van der Sar gerði enn betur í að verja! Það var nóg.  Til hamingju, sir Alex og co.

Ísland -Spánn, góð skemmtun

Leikur okkar manna gegn spánverjum í gærkvöldi hélt mér hugföngnum frá fyrstu mínútu.  Ekki svo að skilja að um hágæðaknattspyrnu hafi verið að ræða, langt í frá.  En viljinn var til staðar hjá okkar mönnum sem lögðu sig alla í þennan leik.  Mark Emils var stórglæsilegt enda sendingin frá Jóhannesi Karli meistaraverk.  Verra var að svo góður spyrnumaður og baráttujaxl sem Jóhannes er hafi ekki spilað allan leikinn. Það var liðsheildin sem var besti maður íslendinga í gærkvöldi og spennandi að sjá hvort takist að halda rétta andanum á miðvikudaginn.  Ég bíð spenntur eftir leiknum á móti Norður Írum og hætti hugsanlega á að heimsækja góðkunningja minn, írann Iian Peter, til að horfa á leikinn með honum.

Áfram ÍA og hvað varð um ÍBK?

Skagamenn eru á góðri leið í efstu deild karla.  Sérstaklega hefur gengið vel um miðbik keppninnar.  Á sama tíma eru Keflvíkingar heillum horfnir.  Ég er að velta því fyrir mér hvort atvikið umdeilda þegar Bjarni skoraði "óvart" fyrir ÍA á móti þeim í byrjun júlí sitji i þeim.  Það virðist hafa orðið vendipunktur fyrir ÍBK, en ég minnist þess að liðið var frábærlega spilandi í fyrstu leikjum mótsins.  Síðan þetta slysamark var sett gegn ÍBK hafa þeir varla fengið stig.  Getur verið að þetta eina atvik skýri hrun Keflvíkinga?