Er það hvalur sem veltur þarna niður götuna?

Kallaði nágranni minn á eftir mér í fyrsta skipti sem ég vogaði mér út að skokka.  Þá var ég 25 kg. yfir kjörþyngd; hafði þyngst verulega eftir að ég hætt að reykja.  Ég dróst á milli ljósastaura móður og másandi en síðan eru liðin fimm ár.  Í dag hef ég náð flestum aukakílóunum af mér og tekið þátt í almenningshlaupum, m.a. hálfmaraþoni.  Þá hef ég keppt 5 sinnum í þríþraut.  Byrjað á hálfri þraut og vann mig upp í ólympíska þraut.  Nei það var ekki hvalur sem valt niður götuna.  Ég stend í ævarandi þakkarskuld við nágrannann fyrir þessa niðrandi athugasemd því þetta mótlæti í upphafi hefur fekar hvatt mig en latt á hlaupum mínum. 

Sama ríkisstjórn áfram?

Einhverjar líkur virðast á því að ríkisstjórnin sitji áfram.  Samkvæmt fréttum virðist sem  fjármálamarkaðurinn sé sáttur við það.  Kannski er það svo að íbúar landsbyggðarinnar, þar sem fylgi Framsóknar er mest, séu sáttir við það.  Ég held að Framsókn ætti að fara í naflaskoðun hið fyrsta.  Ósamkomulag milli manna gæti stafað af því að flokkurinn hefur verið við völd of lengi (32 ár í stjórn af síðustu 36).  Nú þarf að hugsa meira um hugmyndafræðina, félagshyggju og sammvinnu.  Byggja á upp innra starfið næstu misserin og þar er Jón Sigurðsson réttur maður á réttum stað. 

Niðurstöður kosninga - Framsókn tapar stórt

Þá hefur þjóðin fellt sinn dóm.  Of langt mál væri að telja upp það sem lesa má út úr kosningaúrslitunum.  Læt ég stjórnmálaskýrendur um það.  Ljóst má þó vera að umhverfissjónarmið sigruðu.  Í þeim málaflokki hefur Framsóknarflokkurinn orðið undir í áróðursstríði.  Þá er ljóst að Framsóknarflokknum er ekki treyst til að  starfa að velferðarmálum eftir 12 ára samstarf við Íhaldið.  Framsóknarflokkurinn er jú flokkur félagshyggju og samvinnu.  Þar þarf að greina hann enn betur frá Sjálfstæðisflokknum.  

Þingeysk þríþraut 11. ágúst í sumar

Undanfarin fimm ár hefur verið haldin þríþraut í Þingeyjarsýslu, oftast á Húsavík.  Síðustu tvö ár hefur verið synt Laugum, hjólað til Húsavíkur og hlaupið þar.  Í fyrra voru 17 þátttakendur og hafa sumir tekið þátt frá upphafi.  Í sumar verður boðið uppá ólympíska þraut, sem er 1500 metra sund, 40 kílómetra hjólreiðar og 10 kílómetra hlaup.  Að sjálfsögðu er hægt að taka þátt með því að fara styttri vegalengdir eða einbeita sér að einni grein.  Nánar síðar.

Jón Sigurðsson og Framsókn í tilvistarkreppu

Í gær sat ég ca. 50 manna opin fund á Gamla Bauk á Húsavík með Jóni Sigurðssyni, formanni  Framsóknarflokksins, og frambjóðendum flokksins í Norðausturkjördæmi.  Flokkurinn hefur átt undir högg að sækja í kosningabaráttunni.  Jón getur sett svip sinn á íslensk stjórnmál næstu árin, fái hann tækifæri til þess.  Að mínu mati þarf Framsóknarflokkurinn á leiðsögn Jóns að halda við endurskipulagningu flokksins.   Jón er bæði skynsamur og farsæll maður.

Stjórnmál 21. aldarinnar

Mikið er um stjórnmálaskýringar á blogginu nú í aðdraganda kosninga. Mér finnst sem fjórflokkakerfið, sem Jónas Jónsson frá Hriflu er aðalhöfundur að, lifi enn góðu lífi.  Ég trúi því að stjórnmál 21. aldarinnar muni áfram snúast um hugtökin vinstri og hægri, en að við munum sjá fleiri víddir og áherslur.  Umhverfismálin eru reyndar að koma sterk inn síðasta áratuginn og vísbending um þátttöku minnihlutaópa í stjórnmálum sást fyrir þessar kosningar.  Aldraðir og öryrkjar settu sig í stellingar en hættu við. Ótrúlegt hvað leiksvið stjórnmálanna hefur lítið breyst í heila öld.   

Einhverntíma hafa allir byrjað

Allir hafa einhverntíma byrjað. Nú er ég sem sagt byrjaður að blogga.