Fuglaskoðun í gömlu fundahúsi

Hugmyndir eru uppi um að gera aðstöðu til fuglaskoðunar í gamla fundahúsinu við Víkingavatn.  Það voru félagsmenn í Ungmennafélagi sveitarinnar sem reistu þetta hús árið 1924, en síðustu áratugi hefur því vantað hlutverk - að mestu.  Þar hafa safnast saman hlutir sem ekki má henda og hefur það nú verið staðfest af fulltrúum ferðamála og fleirum skilst mér; ... að þaðan megi alls ekki henda neinu nema það sé fyrst skoðað af fólki sem getur forðað menningarverðmætum frá því að  fara á haugana. 

Fuglaðskoðun í húsi með sögu og safngripum!  Er það unga fólkið sem fær svo frjóar hugmyndir? Nei, það er Þórarinn bóndi í Vogum, á áttræðisaldri sem sótti námskeið í Þistilfjörð um sprotafyrirtæki á vegum símenntunarstöðva, vegna þess að á þeim kvöldum sem hann átti styttra að fara á sama námskeið til Húsavíkur, voru kóræfingar í karlakórnum. 

Þessi skapandi hugmynd vekur áhuga minn vegna þess að fuglalíf við Víkingavatnið er fjölskrúðugt og ekki myndi spilla að skoða tilhugalíf og lífsbaráttu fuglanna í þar til gerðum  kíkjum og græjum í fornu fundarhúsi, uppgerðu.  Ég stoppaði við vatnið í nokkrar mínútur um Hvítasunnuna og þekkti þar lóm, skarf, gæsir, endur, hettumáf, kríu, hrossagauk, stelk, lóu og maríuerlu að ógleymdum einum flórgoða.  Ég held að fuglaskoðun sé hin besta skemmtun með réttum græjum.

Athugasemdir

[Guðrún Emilía Guðnadóttir, 15.5.2008 kl. 08:46]

Frábær hugmynd hjá Þórarinn bónda, ekki gat hann nú misst af karlakórsæfingu, sei, sei, nei.
Að skoða fuglalífið er sumum ástríða, en hér hjá mér á hólnum er fuglaflóra mikil túnið okkar hlýtur að hafa upp á mikið að bjóða því þeir líta ekki við túnunum sitt hvoru megin við.
Maður kemst að miklu varðandi fuglana t,d, skógarþrösturinn ætlar sér vissan stað á túninu og skulu þá hinir bara passa sig ef þeir voga sér á hans yfirráðasvæði. Allskonar smáfuglar eru hér með viðkomu, síðan fáum við endurnar í heimsókn eins og allir aðrir hér um kring, þú kannast nú við það.
það er nú með þær eins og í sambúð manna og kvenna, reyndar að mati manna að konan ræður, steggurinn fær ekki að borða fyrr heldur en hún er orðin södd. Við erum nú ekki svona slæmar.
þannig að sitja hér við eldhúsgluggann horfa út yfir flóann og yfir í kinnafjöllin, síðan að horfa á fuglalífið í garðinum.
Eigi er hægt að hugsa sér meiri gleði.
                                 Kveðja Milla.

[Sigurjón Þórðarson, 17.5.2008 kl. 11:26]

Þetta er gott framtak.