Ofstuðluð vísa

Sigurður Sigurðarson, dýralæknir, kenndi mér þessa vísu í Vogum í Kelduhverfi á Hvítasunnudag.  Tilefnið var það að Þingeyingar leituð logandi ljósi að einvherjum til að taka við þingmennsku (koma í stað) Jónasar frá Hriflu.  Fundu þeir Björn á Brún.  Einhver Helgi á Húsavík, sem ég kann ekki frekari deili á, var mjög áfram um að fá Björn í stað Jónasar.  En vegna efnis vísunnar skal tekið fram að Helgi var barnlaus.  Þá átti Egill Jónasson að hafa kveðið:

Ef að Helgi eignast börn,

öll þau heita lætur

Björn, Björn, Björn, Björn og Björn,

bæði syni og dætur.

 

Litróf kennsluaðferða

Sat fundi með Ingvari Sigurgeirssyni frá KHÍ í dag.  Tilefnið var þróunarverkefni við Framhaldsskólann á Laugum sem stendur yfir í þrjú ár.  Eitt ár er nú liðið.  Þetta er spennandi verkefni og í mörg horn að líta.

Kjördæmamót í bridge á Ísafirði

Helgina 19.-20. maí spilaði ég bridge á kjördæmamóti á Ísafirði.  Gaman að því og ég hitti marga gamla kunningja, aðallega af Austurlandi.  Ég hef ekki oft átt leið til Vestfjarða, kom þangað síðast sumarið 1999;  Brá mér allverulega við að rifja upp íbúatölur í fjórðungnum.  Greinileg fækkun frá þeirri landafræði sem ég lagði síðast á minnið.  Annars var gaman að ferðast um Djúpið og gista í sumarbyggðinni á Súðavík.  Þarna ætti maður auðvitað að koma oftar.

Afsögn Jóns Sigurðssonar

Það er líklega rökrétt af Jóni að segja af sér í stöðunni.  Formaður flokksins hefði þurft að komast á þing því miður.  Þar fór enn og aftur illa fyrir Framsókn.  Uppbyggingarstarfið í stjórnarandstöðu hefði að mínu mati hentað Jóni vel.  En Jón metur stöðuna svona.  Ég óska honum alls góðs. 

Í vinsemd þeir vega hvern annan

Glórulaust hjá trúnaðarmanni Framsóknarflokksins að gaspra um það í sjónvarpsviðtali að Jón Sigurðsson komi til með að segja af sér. Sem Jón leiðrétti snarlega með tilvísuninni "fréttir af andláti mínu eru stórlega ýktar".  Svo virðist sem Jón hafi ekki náð að temja öll trippin í Framsókn.  Þau eru sjálfum sér verst því miður.  Þarna var óvarlega talað sýnist mér, einkum vegna þess að stjórnarmyndunarviðræður eru í gangi. Þetta var taktlaust finnst mér.

Hvenær er of vont veður til að fara út að hlaupa?

Ég kynntist Ingólfi Sveinssyni, geðlækni, þegar hann starfaði á Fjórðungssjúkrahúsinu í Neskaupstað. Einnig fylgdist ég með honum í Barðsneshlaupinu, sem fram fer ár hvert um verslunarmannahelgi á Neistaflugi.  Þess má geta að Barðsnes er æskuheimili Ingólfs. Ég hef fyrir löngu síðan sett mér það mark að taka þátt í þessu hlaupi.  Þessar síðustu vikur hefur verið frekar kalt og ekki alltaf spennandi að reima á sig hlaupaskóna til að fara út að hlaupa.  Þá minnist ég orða Ingólfs þegar við ræddum um sameiginlegt áhugamál, hlaupin; en hann sagði; "Þórir, hvenær er veður of vont til að fara út að hlaupa?"  Eftir nokkra umhugsun varð ég að viðurkenna fyrir bæði mér og honum að  það er víst hægt í nánast hvaða veðri sem er.

Skynsemi hjá Framsókn eða réði Geir því öllu?

Framsóknarmenn, með Jón Sigurðsson í forystu, virtust í dag gera hið rétta varðandi það að taka ekki þátt í næstu ríkisstjórn.  En líklega réðu Sjálfstæðismenn því öllu.  Engu að síður var Þetta  góð niðurstaða í ljósi þess að Framsókn átti engan góðan leik en gat gert illt verra eftir fylgistap í þessum kosningum.  Þá er bara að byggja upp og vera tilbúinn í næsta stríði.  Jóni Sigurðssyni er nú vandi á höndum þar sem hann getur ekki tekið þátt í stjórnmálaumræðunni í þinginu þegar þar að kemur.  Jón getur samt unnið  gott starf til uppbyggingar fyrir Framsókn.

Er það hvalur sem veltur þarna niður götuna?

Kallaði nágranni minn á eftir mér í fyrsta skipti sem ég vogaði mér út að skokka.  Þá var ég 25 kg. yfir kjörþyngd; hafði þyngst verulega eftir að ég hætt að reykja.  Ég dróst á milli ljósastaura móður og másandi en síðan eru liðin fimm ár.  Í dag hef ég náð flestum aukakílóunum af mér og tekið þátt í almenningshlaupum, m.a. hálfmaraþoni.  Þá hef ég keppt 5 sinnum í þríþraut.  Byrjað á hálfri þraut og vann mig upp í ólympíska þraut.  Nei það var ekki hvalur sem valt niður götuna.  Ég stend í ævarandi þakkarskuld við nágrannann fyrir þessa niðrandi athugasemd því þetta mótlæti í upphafi hefur fekar hvatt mig en latt á hlaupum mínum. 

Sama ríkisstjórn áfram?

Einhverjar líkur virðast á því að ríkisstjórnin sitji áfram.  Samkvæmt fréttum virðist sem  fjármálamarkaðurinn sé sáttur við það.  Kannski er það svo að íbúar landsbyggðarinnar, þar sem fylgi Framsóknar er mest, séu sáttir við það.  Ég held að Framsókn ætti að fara í naflaskoðun hið fyrsta.  Ósamkomulag milli manna gæti stafað af því að flokkurinn hefur verið við völd of lengi (32 ár í stjórn af síðustu 36).  Nú þarf að hugsa meira um hugmyndafræðina, félagshyggju og sammvinnu.  Byggja á upp innra starfið næstu misserin og þar er Jón Sigurðsson réttur maður á réttum stað. 

Niðurstöður kosninga - Framsókn tapar stórt

Þá hefur þjóðin fellt sinn dóm.  Of langt mál væri að telja upp það sem lesa má út úr kosningaúrslitunum.  Læt ég stjórnmálaskýrendur um það.  Ljóst má þó vera að umhverfissjónarmið sigruðu.  Í þeim málaflokki hefur Framsóknarflokkurinn orðið undir í áróðursstríði.  Þá er ljóst að Framsóknarflokknum er ekki treyst til að  starfa að velferðarmálum eftir 12 ára samstarf við Íhaldið.  Framsóknarflokkurinn er jú flokkur félagshyggju og samvinnu.  Þar þarf að greina hann enn betur frá Sjálfstæðisflokknum.