Er afskaplega fátt sem við vitum alveg fyrir víst?

Ég var að lesa um Sókrates.  Gott væri ef fólk grennslaðist oftar fyrir um skoðanir sínar og tæki þeim ekki að gefnu sem sannleika án þess að kanna heimildir.  „Gagnrýnin hugsun“ felst í því að ekki er fallist á neitt nema það sem rannsakað hefur verið.  Sókrates taldi að fólk væri ekki illt að upplagi en það gerði öðrum illt með því að missa sjónar á sannleikanum.  Það skorti bara þekkingu og yfirsýn. Sjálfur reyndi hann sjálfan sig og viðmælendur sína í rökræðum um ólíklegustu mál.  Viðmælendurnir lentu stundum út af sporinu eða komust í mótsögn við sjálfa sig, svo slyngur var Sókrates í rökræðum.  En markmið hans var  ekki að gera lítið úr fólki heldur að kenna því að hugsa rétt. Ryðja burt fordómum og brjóta málin til mergjar áður en komist væri að niðurstöðu. Sjálfur sagðist hann vita það eitt að hann vissi ekki neitt!

Fordómar undir yfirskyni aulafyndni

Af gefnu tilefni rifjaði ég upp nokkur atriði varðandi fordóma. Fæstum
er gefið að tala niðrandi til náunga síns og hæðast að honum, enda á
það varla við nema í þröngum vinahópi.  Hann er vandmeðfarinn hinn
þröngsýni gálgahúmor því oft kemur hann upp um þekkingarleysi og
fordóma í garð þess sem háðinu er beint að. Fordómar eru bæði
hættulegir og særandi. Hættan felst í því að þeir geta farið að hafa
áhrif á hegðun þess sem fyrir verður og leitt til mismununar.
Einstaklingur sem dæmdur er út frá fyrirfram gefnum alhæfingum um
tiltekin hóp, er um leið sviptur möguleikanum á að sýna hver hann er í
raun og veru.  Sjálfsmyndin brotnar og líðan viðkomandi getur
versnað bæði á líkama og sál.  Fordómar eru því ekkert annað en
skaðleg vopn sem beitt er gegn heilsu fólks og veldur það vopn síst
minni skaða þó það sé notað með þröngsýna gálgahúmorinn að
yfirskyni.  Sá sem fyrir slíkri aulafyndni verður ætti að upplýsa
hinn ófyndna aula um skaðsemi háðsins og það sem að framan er ritað.

Áfram ÍA

Enn einu sinni sýna Skagamenn hvernig á að ná árangri í fótbolta.  Minnstu munaði að þeir ynnu leikinn á móti Val.  Það má sjá áhrif hins magnaða þjálfara Guðjóns Þórðarsonar skína í gegn.  Þetta hlýtur að vera góð leiktíð hjá honum og Skagaliðinu öllu.  Sérstaklega er gaman að sjá ungu strákana axla ábyrgð og standa undir henni.  Áfram ÍA.

17 íbúðir í byggingu á Húsavík en fækkar um 40 börn í grunnskólanum?

Í Skarpi, fréttablaði sem gefið er út á Húsavík, segir að 17 íbúðir séu nú í byggingu á Húsavík.  Miklar væntingar vegna fyrirhugaðs álvers á svæðinu virðast skýra það að verktakar eru að framleiða íbúðarhúsnæði til sölu.  Í haust fækkaði nemendum í grunnskólanum hins vegar um 40, að sögn kennara við skólann.  Sami kennari segir mér að fækkað hafi um 90 börn síðustu 2-3 árin.  Þessi fækkun grunnskólabarna hlýtur að þýða umtalsverða fækkun íbúa á Húsavík. 

Ísland -Spánn, góð skemmtun

Leikur okkar manna gegn spánverjum í gærkvöldi hélt mér hugföngnum frá fyrstu mínútu.  Ekki svo að skilja að um hágæðaknattspyrnu hafi verið að ræða, langt í frá.  En viljinn var til staðar hjá okkar mönnum sem lögðu sig alla í þennan leik.  Mark Emils var stórglæsilegt enda sendingin frá Jóhannesi Karli meistaraverk.  Verra var að svo góður spyrnumaður og baráttujaxl sem Jóhannes er hafi ekki spilað allan leikinn. Það var liðsheildin sem var besti maður íslendinga í gærkvöldi og spennandi að sjá hvort takist að halda rétta andanum á miðvikudaginn.  Ég bíð spenntur eftir leiknum á móti Norður Írum og hætti hugsanlega á að heimsækja góðkunningja minn, írann Iian Peter, til að horfa á leikinn með honum.

Gott hjá Fjölni

Undanúrslitaleikurinn í VISA keppni karla var vel spilaður og góð skemmtun. Vonandi fá lánsmenn úr FH að spila úrslitaleikinn sjálfan.

Áfram ÍA og hvað varð um ÍBK?

Skagamenn eru á góðri leið í efstu deild karla.  Sérstaklega hefur gengið vel um miðbik keppninnar.  Á sama tíma eru Keflvíkingar heillum horfnir.  Ég er að velta því fyrir mér hvort atvikið umdeilda þegar Bjarni skoraði "óvart" fyrir ÍA á móti þeim í byrjun júlí sitji i þeim.  Það virðist hafa orðið vendipunktur fyrir ÍBK, en ég minnist þess að liðið var frábærlega spilandi í fyrstu leikjum mótsins.  Síðan þetta slysamark var sett gegn ÍBK hafa þeir varla fengið stig.  Getur verið að þetta eina atvik skýri hrun Keflvíkinga?

Góður árangur í Þingeyskri þríþraut

Þingeysk þríþraut var haldinn í 6. sinn þann 12. ágúst síðastliðinn.  Alls tóku 18 þátt í þrautinni að þessu sinni, þar af reyndu 11 við heila þraut.  Afar góður árangur náðist að þessu sinni.  Bryndís Arnarsdóttir sigraði í kvennaflokki og Steinn Jóhannsson í karlaflokki.  Þau náðu mjög góðum tímum, en geta má þess að Jens Viktor Kristjánsson, formaður Þríþrautafélags Reykjavíkur, náði besta hjólatímanum 1.11,08 með 40 kílómetra.  Steinn náði frábærum tímum í hlaupi eða 40,15 mínum að meðtöldum skiptitíma eftir að stigið var af hjólinu.  Sundtími Steins var ótrúlega góður líka, eða 19,57 mín með 1500 metrana.  Bryndís hjólaði afar vel og var 1.25,15 klst með 40 kílómetrana, en hún hljóp 10 km á ca. 1 klst.  Það var svo systir mín Hólmfríður Aðalsteinsdóttir sem náði bestum tíma kvenna í 1500 metra sundi, eða 27,38 mín. Og ekki má gleyma því að hin systir mín Arnfríður Aðalsteinsdóttir synti 500 metrana best allra á 9,19 mín. 

Þar fór Þorbergur sem fuglinn fljúgandi

Barðsneshlaupið var rúmlega hálfnað. Ég var á hlaupum, að því er mér fannst, í Búlandinu eftir að hafa klöngrast niður Götuhjallann ógurlega.  Götuhjallinn er í 200 metra hæð yfir sjó og á köflum er um einstigi að fara þannig að leiðin er ekki fyrir lofthrædda.  Á þessum slóðum þurfti ég að fara ofan í fjölmarga smálæki sem runnu úr brattri hlíðinni, stikla á steinum og stíga svo upp úr á hinum bakkanum.  Reyndist þetta mér mikið erfiði.  Þar sem ég var staddur ofan í einum þessara skorninga er slegið laust á bakið á mér og ég lít upp.  Sé ég þá nánast undir skósólana á "Norðfirðingnun þindarlausa" Þorbergi Jónssyni, sem hefur verið ósigrandi í Barðsneshlaupinu þau ár sem hann hefur tekið þátt.  Það var þá sem mér fannst ég ekki vera að hlaupa lengur; þegar ég horfði á  eftir þessum glæsilega 25 ára gamla íþróttamanni þar sem hann fór í loftköstum eftir Búlandinu.  Hann klöngraðist ekki yfir árfarvegi heldur tók undir sig stökk, 2ja og 3ja metra löng ábyggilega - og mér fannst sem ég stæði kyrr.  Þorbergur ásamt nokkrum afburðahlaupurum hafði verið ræstur klukkutíma seinna en hinir, slíka yfirburði hefur hann í þessu hlaupi.  Hann mun hafa bætt brautarmetið úr rétt rúmum  2 klst í 1 klst og rúmar 57 mínútur í þessu hlaupi.  Glæsileg tilþrif sem gaman var að vera vitni að.

 

Barðsneshlaup með góðum hópi hlaupara

Ég tók lokapróf mitt í því að breyta um lífstíl um Verslunarmannahelgina.  Nú er að setja sér ný markmið.  Breytingin á lífstílnum fólst í agaðra mataræði og stóraukinni hreyfingu.  Það var sjúkaþjálfari í hlutverki einkaþjálfara sem lagði línurnar fyrir mig fyrir tveimur árum og 22 kílóum.  Barðsneshlaupið, 27 km torfæruhlaup um þrjá firði á Austurlandi, var markmiðið leynt og ljóst en það er óráðlegt að leggja í slíkt erfiði berandi of mörg aukakiló, auk þess sem þjálfa þarf vöðva hér og þar sem verið hafa í afslöppun í áratugi.  Skemmst er frá því að segja að ég skemmti mér vel og Barðsneshlaupið stóð undir væntingum.  Þátttakendur voru um 40, þar af nokkrir fyrrum samstarfsmenn mínir á Fjórðungssjúkrahúsinu í Neskaupstað, þ.á.m. þrír læknar, og ýmsir kunningjar úr Fjarðabyggð.  Á fyrrum vinnustað mínum FSN fékk ég þessa ágætu hugmynd að breyta um lífsstíl til að koma í veg fyrir menningarsjúkdóma vesturlandabúa; en bara með því að minnka kviðfitu dregur úr líkum á nokkrum þeirra.  Þetta mættu fleiri hugsa um og endurhæfa sjálfa sig með leiðsögn fagfólks.